2Cor 1 | MHL | STEP | Yo Pol-ke, i Timoti ikos ni Mua Maneka teeria Korin-pa ikeman nain parosifa fain nainiw nia siisimomimik. Ne ni kame nain Akaiya unowiya pun nia naimik. Yo Mua Maneka ona kookalowa-pa aposel efa naeya Yeesus Krais uuwow mua ikem nain.

2 Corinthians 1

1 Yo Pol-ke, i Timoti ikos ni Mua Maneka teeria Korin-pa ikeman nain parosifa fain nainiw nia siisimomimik. Ne ni kame nain Akaiya unowiya pun nia naimik. Yo Mua Maneka ona kookalowa-pa aposel efa naeya Yeesus Krais uuwow mua ikem nain. 2 I yiam erup feenap nia naimik, Mua Maneka eena yiena Auwa ne yiena Maneka Yeesus Krais ikos nia kemalep nia asipami kema sonom eliwa niuk.

Pol-ke Mua Maneka sira eliwa naakek

3 Aria i Mua Maneka unuma pirikua, o eena yiena Maneka Yeesus Krais Wiawi manek akena yia kemalep yia saliwiya nain. 4 I sirirowa aawem-ikemkun os-ke yia asipiya, naeya i nain paayarep is pun wi mua oko pina sira-sira wiar imenariya nain eliw wia asipiyen. 5 Feenap, Krais sirirowa aawomakek, neemi is pun unowiya naap aawimik. Naapeya Mua Maneka Krais muuta nain manek akena yia asipami yia saliwiya. 6 I Yeesus Krais opora nia maakemi sirirowa aawimik, ne opora nain-ke nia asipeya Mua Maneka teeria-pa ariwkin nia saliwiya. Naapeya i sirirowa aawowa pun eliw naimik. Ne o yia asipami yia kekanowiya nain pun eliw naimik, moram i sirirowa sira-sira aawimik nain nis pun naap aawiman, naeya i nia asipamkun kekanep kekelka ikok pina akuawowen. 7 I epaskun sirirowa aawimik. Ne Yeesus Krais yia asipami yia kekanowam-ikaiya, nis pun naap nia asipiya, naapeya nia maimik, ni kekanep ikeman, nain makena niar naimik.

8 Emar unowik, sirirowa unowa i iiriw Esia kame-pa aawem-ikemik. Naapeya ni amisareka naep maimik. Enankowa yia erowawam-ikaiwkin maemik. Makena, wi umuk naep naap yia onam-ikaiwkin maemik, umowa-ke iiwawun yia wakesimep ikua. Naap yiar imenareya yiam furewap maemik, “I me yiena kekanowa-pa ikemik, weetak, i Mua Maneka kekanowa-pa wiar ikemik. O eena mua umimik nain wia iikirowiya nain-ke.” 10 Ne i sirirowa manek akena yiiwkin lawiliw akena umekamik. Nain ona yia naapak, ne pun anane naap yia naapam-ikainon. Ne ni yia kema suuwami Mua Maneka fariwkin yia naapam-ikainok. Naap onami mua unowa Mua Maneka farep opora o maakimik nain wiar miimap yia naapinon. Naeya mua unowa nain yiar urufap maikuan, Mua Maneka-ke manek akena wia asipiya. Naemi unowiya sira eliwa naakikuan.

Pol wi wiar ikiwowa maek nain kiiriw kema oko wuak

12 I miiwa-pa fan ikok sira makena ookami mua unowiya sira eliwa wia onimik. Nain nis i opor makena nia maakemi sira eliw akena nia onimik. Nain me yiena kema-pa maa onimik, weetak. Mua Maneka ona yia asipam-ikaeya ona sira dubil eliwa yiomakek nain kakeniw ookimik. I nain naep kemelami palanimik. 13 I parosifa nia siisimomimik nain opora kokot-ko me ikua, kemena ariman akena, ni unufap kema farerep-puiman. Ne i nia maakimik nain kemena eliw aawowen. Ni aakisa sira me yiar amisar-afuraman, makena i maa mauwa onamik nain yiena Maneka Yeesus nainiw ekapiya fofa neeke baliwep amisarowen. Naeya ni eliw yia naep kemelap niam irowen. Ne is pun naap, ni nia naep kemelap yiam iriyen.

15 Yo naapeya kema-ke feenap efar ikua. Yo Masedonia ikiwemi niar ikiwep nia urufap-puap ikiwinen, ne nainiw Masedonia-pa kiremi nia urufinen. Neeke nia karuowa erup aremkun efa urufap nainiw kemelowen. Neek ikemkun nis-ke era efa asipiwkin Yuudia kame ikiwinen. Yo naap maem. 17 Aria oko feenap efa maowen, “O oram oporiw maiya.” Ne yo Mua Maneka nokarowa marew yena kookalowa ookap maem-i? Ae naep-puap kiiriw weetak nainen-i? Weetak, yo naap me oniyem.

18 Mua Maneka makena-ke. Naapeya o mokok epa-pa opor makena maiyem. Yo ae naep-puap kiiriw weetak me mainen. 19 Moram yo, Sailas ne Timoti naap ona Muuka Yeesus Krais nain nia maakimik nain makena-ke. O ae naep-puap nainiw weetak me nainon. 20 Mua Maneka eena opor unowa maep koonowak nain Krais-ke ae naep Wiawi opora wiar opap makena yia opomak. Ne naapeya i o unuma-pa Mua Maneka unuma pirami anane maimik, “Makena.” 21 Mua Maneka ona yia nanikap yia aawep yia kekanoweya Yeesus opora wiar opimik. Ne ona yia aawok nain opora makena efar arinok naep Ewar Eliwa kema-pa yia wuomak. Naeya ona opora maep koonowak nain makena yia opominon. Ona naap oneya i unowiya maken akena Krais wameiya ikemik.

23 Aria yo Mua Maneka unuma-pa makena nia maakiyem. Ni Korin niar ikiwowa maem nain, ewur me niar ikiwem. Moram yo ikip nia amukarowa miatiniyem. 24 I me woos mua yiam puukowap Yeesus opora baliwep ookowa nia suuwimik, weetak. Moram ni kekanep opora wiar opap ikaiman. Niamiya uuwamkun ni baliwep ikok kemeleka naep maem. Yo muut nain niar ikiwowa maem.